ശ്രീകണ്ഠാപുരം വാർത്തകൾ

ഇരിക്കൂർ: ഇരിക്കൂർ നിയോജക മണ്ഡലത്തിൻ്റെ സമഗ്ര വികസനം ലക്ഷ്യമിട്ട് മുസ്ലിം ലീഗ് ഇരിക്കൂർ മണ്ഡലം കമ്മിറ്റിയുടെ നേതൃത്വത്തിൽ അഡ്വ. സജീവ് ജോസഫ് എം.എൽ.എ.യുമായി മുഖാമുഖം നടത്തി. കഴിഞ്ഞ 10 വർഷത്തെ ഇടതുപക്ഷ ഭരണത്തിൻ കീഴിൽ കടുത്ത അവഗണന നേരിട്ട മലയോര മേഖലയുടെ തിരിച്ചുവിരവും ഉയർത്തെഴുന്നേൽപ്പുമാണ് മുസ്ലിം ലീഗ് ഇതിലൂടെ ലക്ഷ്യം വെക്കുന്നത്. സംസ്ഥാനത്ത് യു.ഡി.എഫിന് ഭരണം ലഭിച്ച സാഹചര്യത്തിൽ, വികസന പ്രവർത്തനങ്ങൾക്ക് വ്യക്തമായ മുൻഗണനാ ക്രമം നിശ്ചയിച്ച് മുന്നോട്ടുപോകാൻ യോഗത്തിൽ തീരുമാനമായി. മണ്ഡലത്തിലെ ഒരു പ്രദേശവും അവഗണിക്കപ്പെടാതെ, എല്ലാ മേഖലകളിലും തുല്യമായ രീതിയിൽ പദ്ധതികൾ നടപ്പിലാക്കണമെന്ന് ഭാരവാഹികൾ എം.എൽ.എ.യോട് ആവശ്യപ്പെട്ടു. ഇതിനായി കൃത്യമായ പദ്ധതി രൂപരേഖ തയ്യാറാക്കി വികസന പ്രവർത്തനങ്ങളുമായി മുന്നോട്ടുപോകാൻ യോഗത്തിൽ തീരുമാനമായിട്ടുണ്ട്. ഇരിക്കൂർ മണ്ഡലം മുസ്ലിം ലീഗ് പ്രസിഡൻ്റ് പി.ടി.എ. കോയ മാസ്റ്റർ, ജനറൽ സെക്രട്ടറി ടി.എൻ.എ. ഖാദർ, ട്രഷറർ വി.എ. റഹീം എന്നിവരും ഭാരവാഹികളായ പി.പി. ഖാദർ, കെ.പി. മൊയ്തീൻ കുഞ്ഞി മാസ്റ്റർ, കെ.പി. അബ്ദുള്ള, എ. അഹമ്മദ് കുട്ടി ഹാജി, ഇ.എം. നാസർ എന്നിവരും ചർച്ചയിൽ പങ്കെടുത്തു.