ശ്രീകണ്ഠാപുരം വാർത്തകൾ

ശ്രീകണ്ഠപുരം: പൊടിക്കളം മേരി ഗിരി ഇംഗ്ലീഷ് മീഡിയം സ്കൂളിൽ ജൂനിയർ റെഡ്ക്രോസ് (ജെ.ആർ.സി.) കേഡറ്റുകളുടെ സ്കാർഫിംഗ് സെറിമണിയും സത്യപ്രതിജ്ഞാ ചടങ്ങും പ്രൗഢഗംഭീരമായി നടന്നു. ജെ.ആർ.സി. ജില്ലാ പ്രസിഡന്റ് ശ്രീ. എൻ. ടി. സുധീന്ദ്രൻ പരിപാടി ഉദ്ഘാടനം ചെയ്തു. വിദ്യാലയങ്ങളിൽ കരുണയുടെയും സേവനത്തിന്റെയും സന്ദേശം പ്രചരിപ്പിക്കുന്നതിൽ ജൂനിയർ റെഡ്ക്രോസിന്റെ പങ്ക് വലുതാണെന്ന് അദ്ദേഹം അഭിപ്രായപ്പെട്ടു. സ്കൂൾ പ്രിൻസിപ്പാൾ റവ. ബ്രദർ ഡോ. റജി സ്കറിയ സി.എസ്.ടി. ചടങ്ങിൽ അധ്യക്ഷത വഹിച്ചു. ജെ.ആർ.സി. മുൻ ഉപജില്ലാ കോഡിനേറ്റർ ശ്രീ. സുനിൽകുമാർ ടി. കേഡറ്റുകൾക്ക് പ്രതിജ്ഞാ വാചകം ചൊല്ലിക്കൊടുത്തു. സ്കൂൾ മാനേജർ റവ. ബ്രദർ ജോണി ജോസഫ് സി.എസ്.ടി., ഫാദർ ജോസ് എന്നിവർ ചടങ്ങിൽ ആശംസകൾ അർപ്പിച്ച് സംസാരിച്ചു. സമീപകാല സി.ബി.എസ്.ഇ. പരീക്ഷയിൽ മികച്ച വിജയം കൈവരിച്ച ജെ.ആർ.സി. കേഡറ്റുകളെ ചടങ്ങിൽ പ്രത്യേക പുരസ്കാരം നൽകി അനുമോദിച്ചു. ചടങ്ങിന് മാറ്റുകൂട്ടി കേഡറ്റുകൾ അവതരിപ്പിച്ച വിവിധ കലാപരിപാടികളും ഗാനാലാപനവും അരങ്ങേറി.