ശ്രീകണ്ഠാപുരം വാർത്തകൾ

ചന്ദനക്കാംപാറ: നിരവധി കുടുംബങ്ങൾ വസിക്കുന്ന ജനവാസ മേഖലയിലൂടെ കടന്നുപോകുന്ന ചന്ദനക്കാംപാറ- മധുവൻമല-ചീത്തപ്പാറ റോഡിൻ്റെ ഇപ്പോഴത്തെ സ്ഥിതി വളരെ ദയനീയമാണ്. ടാറിംഗ് പാടെ തകർന്നതിനാൽ ഇതുവഴി കാൽനട യാത്ര പോലും ഏറെ ദുരിതത്തിലായി. ചെറുവാഹനങ്ങൾക്ക് തീരെ സഞ്ചാരയോഗ്യമല്ലാതായതിനാൽ സാധാരണക്കാരുടെ അത്യാവശ്യങ്ങൾക്കായി ഓട്ടോറിക്ഷ പോലും വരാതായി. മേഖലയിലെ പ്രധാന മലയോര പാതയായ ചന്ദനക്കാംപാറ-പയ്യാവൂർ റോഡിൽ നിന്ന് മധുവൻമല വഴി ചതുരംപുഴ-ചീത്തപ്പാറ റോഡിലേക്ക് എത്തിച്ചേരുന്ന ഈ റോഡിന് രണ്ട് കിലോമീറ്ററോളം ദൈർഘ്യമേയുള്ളു. വർഷങ്ങൾക്ക് മുമ്പ് പയ്യാവൂർ ഗ്രാമപഞ്ചായത്താണ് ഈ റോഡ് ടാറിംഗ് നടത്തി വാഹന ഗതാഗതയോഗ്യമാക്കിയിരുന്നത്. പിന്നീട് കഴിഞ്ഞ അഞ്ച് വർഷത്തോളമായി അറ്റകുറ്റപ്പണികൾ യാതൊന്നും നടത്തിയിട്ടില്ല. പ്രദേശത്തെ നൂറുകണക്കിന് കുടുംബങ്ങളിലെ വിദ്യാർത്ഥികൾ അടക്കമുള്ളവരുടെ ഏക ആശ്രയമായ ഈ റോഡ് എത്രയും വേഗത്തിൽ നവീകരണം നടത്തി ഗതാഗത സൗകര്യം മെച്ചപ്പെടുത്താൻ നടപടിയുണ്ടാകണമെന്നാണ് നാട്ടുകാർ ആവശ്യപ്പെടുന്നത്. ▪️ റിപ്പോർട്ടർ: തോമസ് അയ്യങ്കനാൽ