ശ്രീകണ്ഠാപുരം വാർത്തകൾ

മലപ്പട്ടം: മലപ്പട്ടം പഞ്ചായത്തിലെ അഡൂർ താണപ്പൊയിൽ റോഡിന്റെ ഒരുവശം ഏകദേശം 15 മീറ്ററോളം താഴേക്ക് ഇടിഞ്ഞു വീണു. റോഡ് ഇടിഞ്ഞതിനെ തുടർന്ന് ഇതുവഴിയുള്ള ഗതാഗതവും പ്രദേശവാസികളുടെ സഞ്ചാരവും കടുത്ത അപകടഭീഷണിയിലായിരിക്കുകയാണ്. സംഭവസ്ഥലം ജനപ്രതിനിധികളും വികസന സമിതി ഭാരവാഹികളും സന്ദർശിച്ചു. മലപ്പട്ടം പഞ്ചായത്ത് വൈസ് പ്രസിഡന്റ് പി. വാസന്തി, സ്റ്റാൻഡിംഗ് കമ്മിറ്റി ചെയർമാന്മാരായ സി. അനീഷ് കുമാർ, ഐ.വി. ഒതേനൻ, വാർഡ് മെമ്പർമാരായ കെ.വി. ശാര, ടി.കെ. സുജാത, വാർഡ് വികസന സമിതി കൺവീനർ അമ്പിലോത്ത് രാജൻ എന്നിവരാണ് അപകടമുണ്ടായ സ്ഥലം സന്ദർശിച്ചത്. റോഡിലെ അപകടാവസ്ഥ പരിഹരിക്കുന്നതിനായി ബന്ധപ്പെട്ട അധികൃതർ അടിയന്തര നടപടി സ്വീകരിക്കണമെന്ന് സ്ഥലം സന്ദർശിച്ച ജനപ്രതിനിധികൾ ആവശ്യപ്പെട്ടു.