ശ്രീകണ്ഠാപുരം വാർത്തകൾ

മണിക്കടവ്: കനത്ത മഴയെ തുടർന്ന് കേരളത്തിലെ വിദ്യാലയങ്ങൾക്ക് തുടർച്ചയായി അവധി പ്രഖ്യാപിച്ചപ്പോഴും പഠനവും വിനോദവും മാത്രമല്ല സമൂഹത്തിന് ഉപകാരപ്പെടുന്ന പ്രവർത്തനങ്ങളിലും പങ്കാളികളായി മണിക്കടവ് സെന്റ് തോമസ് ഹയർ സെക്കൻഡറി സ്കൂളിലെ വിദ്യാർത്ഥികൾ. എല്ലാ മാസവും ഒരോ അഗതി മന്ദിരത്തിൽ ഒരു നേരത്തെ ഭക്ഷണം കൊടുക്കുന്ന മണിക്കടവ് ഗ്രാമത്തിൻ്റെ ‘സ്‌നേഹപൂർവം പ്രിയദർശിനി’ പദ്ധതിയുമായി സഹകരിച്ചാണ് വിദ്യാർത്ഥികൾ സ്വന്തം വീടുകളിൽ നിന്ന് കൊണ്ടുവന്ന നൂറിലേറെ ചോറുപൊതികൾ നിരാലംബരായ വൃദ്ധജനങ്ങൾ വസിക്കുന്ന ചെമ്പേരി കരുണാലയത്തിൽ എത്തിച്ചു നൽകിയത്. വിദ്യാർത്ഥികൾ നേരിട്ടെത്തി ഭക്ഷണപ്പൊതികൾ കൈമാറുകയും തങ്ങളെ പരിചരിക്കുകയും ചെയ്തത് വൃദ്ധസദനത്തിലെ അന്തേവാസികൾക്ക് ഹൃദയംനിറഞ്ഞ സ്‌നേഹാനുഭവമായി. അവധി ദിനങ്ങളിൽ വെറുതെയിരിക്കാതെ കരുണയും പങ്കുവയ്ക്കലും സാമൂഹിക ഉത്തരവാദിത്വവും ജീവിതത്തിന്റെ ഭാഗമാക്കിയ വിദ്യാർത്ഥികളുടെ സജീവമായ പങ്കാളിത്തം ഉളിക്കൽ പ്രിയദർശിനി സംഘടനയുടെ പ്രവർത്തകർക്കും വലിയൊരു പ്രചോദനമായി. 🗞️📝 റിപ്പോർട്ടർ: തോമസ് അയ്യങ്കനാൽ