ശ്രീകണ്ഠാപുരം വാർത്തകൾ

പയ്യാവൂർ: കാഞ്ഞിരക്കൊല്ലിയിൽ ഭ്രാന്തൻനായ ആക്രമണം വീണ്ടും രൂക്ഷമാകുന്നു. ഇന്നലെ വൈകുന്നേരം അഞ്ചോടെയാണ് ആക്രമണമുണ്ടായത്. നാട്ടുകാരായ പള്ളിമുറയ്ക്കൽ ജോൺസൺ, ഉളിക്കൽ കെഎസ്ഇബി ജീവനക്കാരൻ ഷിജോ ജോസഫ് എന്നിവർക്കാണ് കടിയേറ്റത്. വീടുകൾക്ക് സമീപത്തെ കൂടുകളിൽ കഴിയുന്ന നിരവധി ആടുകൾക്കും വളർത്തുനായകൾക്കും കടിയേറ്റിട്ടുണ്ട്. പ്രദേശത്തെ ജനങ്ങൾ ഏറെ ഭീതിയിലാണുള്ളത്. ദിവസവും അതിരാവിലെ പള്ളിയിൽ പോകുന്ന കുട്ടികളും മുതിർന്നവരുമായ നിരവധി പേർ ഇതോടെ ആശങ്കയിലുമായി. സ്കൂൾ തുറക്കുന്ന ദിവസവും അടുത്തതിനാൽ എത്രയും വേഗത്തിൽ പരിഹാരനടപടികൾ സ്വീകരിക്കണമെന്ന് കാഞ്ഞിരക്കൊല്ലി നിവാസികൾ പഞ്ചായത്ത് അധികൃതരോട് ആവശ്യപ്പെട്ടു ▪️ റിപ്പോർട്ടർ: തോമസ് അയ്യങ്കനാൽ