ശ്രീകണ്ഠാപുരം വാർത്തകൾ

പയ്യാവൂർ: ഏരുവേശി ഗ്രാമപഞ്ചായത്ത് പരിധിയിലെ കരിങ്കൽക്വാറിക്ക് പ്രദേശവാസികളുടെ എതിർപ്പിനെ തുടർന്ന് ഏരുവേശി പഞ്ചായത്ത് നൽകാൻ തയാറാകാത്ത എക്സ്പ്ലോസീവ് എൻഒസി ശ്രീകണ്ഠപുരം നഗരസഭയിൽ നിന്ന് നൽകാനുള്ള തീരുമാനത്തിനെതിരെ ശക്തമായ പ്രതിഷേധമുയരുന്നു. മെയ് 12 ന് നടത്താൻ തീരുമാനിച്ചിട്ടുള്ള നഗരസഭാ കൗൺസിലിൽ രണ്ടാമത്തെ അജണ്ടയായാണ് ഈ വിഷയം ഉൾപ്പെടുത്തിയിരിക്കുന്നത്. വിവരം ശ്രദ്ധയിൽപെട്ടയുടൻ തന്നെ നഗരസഭയിലെ നാലാം വാർഡ് കൗൺസിലറും ക്വാറി വിരുദ്ധ സമിതി രക്ഷാധികാരിയുമായ കെ.ജെ.ചാക്കോ കൊന്നയ്ക്കൽ ബന്ധപ്പെട്ട അധികാരികളോട് ശക്തമായ പ്രതിഷേധം അറിയിച്ചിരുന്നു. നിരവധി കുടുംബങ്ങൾ വസിക്കുന്നതും അങ്കണവാടി, സ്കൂളുകൾ തുടങ്ങിയ ഇടങ്ങളിലേക്ക് പിഞ്ചുകുട്ടികളടക്കം വഴി നടക്കുന്നതിൻ്റെ സമീപം  മണ്ണിടിച്ചിൽ സാധ്യതയുള്ള പ്രദേശത്തെ ക്വാറിക്ക് എക്സ്പ്ലോസീവ് എൻഒസി നൽകാനുള്ള ശ്രീകണ്ഠപുരം നഗരസഭാധികാരികളുടെ നീക്കം ഉപേക്ഷിച്ചില്ലെങ്കിൽ നഗരസഭാ ഓഫീസിൻ്റെ മുന്നിൽ അതിശക്തമായ സമരത്തിന് താൻ നേതൃത്വം നൽകുമെന്ന് കൗൺസിലർ കെ.ജെ.ചാക്കോ കൊന്നയ്ക്കൽ പത്രക്കുറിപ്പിൽ അറിയിച്ചു.  ▪️ റിപ്പോർട്ടർ: തോമസ് അയ്യങ്കനാൽ