ശ്രീകണ്ഠാപുരം വാർത്തകൾ

ശ്രീകണ്ഠാപുരം: മലയോരത്തിന്റെ അക്ഷരവെളിച്ചമായി, ആയിരങ്ങളെ ജ്ഞാനത്തിന്റെ ലോകത്തേക്ക് കൈപിടിച്ചുയർത്തിയ ചേപ്പറമ്പ് എസ്.എൻ.വി. എൽ.പി. സ്കൂൾ നൂറാം വയസ്സിന്റെ തിളക്കത്തിൽ. 1926 ഏപ്രിലിൽ പി.പി. കണ്ണൻ മാസ്റ്റർ എന്ന ക്രാന്തദർശിയായ അധ്യാപകൻ തെളിച്ച ഏകാധ്യാപക വിദ്യാലയമെന്ന ആ ചെറിയ തിരിനാളം ഇന്ന് ഇരിക്കൂർ ഉപജില്ലയിലെ തന്നെ മുൻനിര വിദ്യാലയമായി പടർന്നു പന്തലിച്ചു നിൽക്കുകയാണ്. സ്വാതന്ത്ര്യസമര കാലഘട്ടത്തിന്റെ സ്പന്ദനങ്ങളേറ്റുവാങ്ങിയും, സ്വതന്ത്ര ഇന്ത്യയുടെ വളർച്ചയ്ക്കൊപ്പം സഞ്ചരിച്ചും ഒട്ടേറെ പ്രതിഭകളെ ഈ വിദ്യാലയം നാടിന് സമ്മാനിച്ചു. കലാ-കായിക-ഔദ്യോഗിക രംഗങ്ങളിൽ വ്യക്തിമുദ്ര പതിപ്പിച്ച പ്രമുഖരുടെയെല്ലാം ആദ്യാക്ഷരങ്ങൾ കുറിക്കപ്പെട്ടത് ഈ മണ്ണിലായിരുന്നു. അക്കാദമിക മികവിൽ കണ്ണൂർ ജില്ലയിൽ തന്നെ ശ്രദ്ധേയമായ സ്ഥാനം നിലനിർത്തുന്ന ഈ വിദ്യാലയം ഇപ്പോൾ ഒരു വർഷം നീണ്ടുനിൽക്കുന്ന ശതാബ്ദി ആഘോഷങ്ങളുടെ സമാപന നിറവിലാണ്. ആഘോഷങ്ങളിലൂടെ… കഴിഞ്ഞ ഏപ്രിലിൽ ആരംഭിച്ച ശതാബ്ദി ആഘോഷങ്ങൾക്ക് സജീവ് ജോസഫ് എം.എൽ.എ. ലോഗോ പ്രകാശനം ചെയ്തതോടെയാണ് തുടക്കമായത്. മുൻകാല പി.ടി.എ. ഭാരവാഹികളെ ആദരിച്ച ‘ആദരസന്ധ്യ’, അക്ഷരസ്നേഹികൾക്കായി ഒരുക്കിയ ‘സാഹിതീയം ലിറ്ററേച്ചർ ഫെസ്റ്റ്’ എന്നിവ ആഘോഷങ്ങൾക്ക് മാറ്റ് കൂട്ടി. കുടുംബ സംഗമം നാളെ ശതാബ്ദി വർഷത്തിലെ സുപ്രധാന ചടങ്ങായ കുടുംബ സംഗമം നാളെ നടക്കും. വിദ്യാലയത്തിലെ നിലവിലെ വിദ്യാർത്ഥികളും രക്ഷിതാക്കളും ഒത്തുചേരുന്ന ഈ സംഗമം പ്രമുഖ പ്രഭാഷകൻ വി.കെ. സുരേഷ് ബാബു ഉദ്ഘാടനം ചെയ്യും. പൂർവ്വ വിദ്യാർത്ഥി സംഗമം ഫെബ്രുവരിയിൽ നൂറു വർഷത്തിനിടയിൽ ഈ പള്ളിക്കൂടത്തിന്റെ പടികയറിയ പരമാവധി പൂർവ്വ വിദ്യാർത്ഥികളെ ഒരേ കുടക്കീഴിൽ അണിനിരത്തുന്ന വിപുലമായ ‘പൂർവ്വ വിദ്യാർത്ഥി സംഗമം’ ഫെബ്രുവരിയിൽ നടക്കും. ഇതിനായുള്ള ഒരുക്കങ്ങൾ ഊർജ്ജിതമായി നടന്നുവരികയാണ്. ശതാബ്ദി സ്മരണകൾ ഉൾക്കൊള്ളുന്ന സുവനീർ പ്രകാശനവും ഇതോടൊപ്പം നടക്കും. മാർച്ച് മാസത്തിൽ നടക്കുന്ന വിപുലമായ വാർഷിക സമ്മേളനത്തോടെ ശതാബ്ദി ആഘോഷങ്ങൾക്ക് സമാപനമാകും. വാർത്താസമ്മേളനത്തിൽ സംഘാടക സമിതി ചെയർമാൻ എൻ.എ. ഉമേഷ്, കൺവീനർ കെ.ജെ. ജോണി, പ്രഥമാധ്യാപകൻ പി.കെ. ശ്രീജിത്ത്, എസ്.ആർ.ജി. കൺവീനർ പി.പി. അജയൻ, പി.ടി.എ. പ്രസിഡന്റ് സി.കെ. സതീശൻ എന്നിവർ പങ്കെടുത്തു.