ശ്രീകണ്ഠാപുരം വാർത്തകൾ

ചെമ്പേരി: നിർമല ഹയർ സെക്കൻഡറി സ്കൂളിലെ 1991 എസ്എസ്എൽസി ബാച്ചിൻ്റെ കൂട്ടായ്മയായ ‘ഓർമ 91’ ൻ്റെ ആഭിമുഖ്യത്തിൽ വിവിധ പഞ്ചായത്ത് വാർഡുകളിൽ മെംബർമാരായി തെരഞ്ഞെടുക്കപ്പെട്ട തങ്ങളുടെ മുൻ സഹപാഠികൾക്ക് ആദരവ് നൽകി. ഏരുവേശി പഞ്ചായത്ത് മെംബർമാരായ ജോൺസൺ പുലിയുറുമ്പിൽ, ബി.ലത, സാലി വെള്ളവള്ളിയിൽ, കോട്ടയം ജില്ലയിലെ അതിരമ്പുഴ പഞ്ചായത്തിലേക്ക് തെരഞ്ഞെടുക്കപ്പെട്ട ഷാൻ്റി സെബാസ്റ്റ്യൻ എന്നിവരെയാണ് ആദരിച്ചത്. ചെമ്പേരി വ്യാപാരഭവൻ ഓഡിറ്റോറിയത്തിൽ നടന്ന സംഗമം സ്കൂൾ മാനേജരും ചെമ്പേരി ലൂർദ് മാതാ ബസിലിക്ക റെക്ടറുമായ റവ.ഡോ. ജോർജ് കാഞ്ഞിരക്കാട്ട് ഉദ്ഘാടനം ചെയ്ത് ആദരിക്കപ്പെട്ടവർക്ക് മൊമെൻ്റോ സമ്മാനിച്ചു. ‘ഓർമ 91’ കൂട്ടായ്മ പ്രസിഡൻ്റും കേരള വ്യാപാരി വ്യവസായി ഏകോപന സമിതി ചെമ്പേരി യൂണിറ്റ് പ്രസിഡൻ്റുമായ സാബു മണിമല അധ്യക്ഷത വഹിച്ചു. കൂട്ടായ്മ സെക്രട്ടറി സിബി കുളിരാനി ആമുഖ പ്രഭാഷണം നടത്തി. 91 ബാച്ച് സഹപാഠികളായ ഏരുവേശി സഹകരണ ബാങ്ക് പ്രസിഡൻ്റ് അനിൽ പി. ജോർജ്, സോയിച്ചൻ കുളത്തറ, ഷീബ ഈന്തുംതോട്ടത്തിൽ, വി.പി.തമ്പാൻ തുടങ്ങിയവർ പ്രസംഗിച്ചു. ▪️ റിപ്പോർട്ടർ: തോമസ് അയ്യങ്കനാൽ