ശ്രീകണ്ഠാപുരം വാർത്തകൾ

പയ്യാവൂർ: ഗ്രാമപഞ്ചായത്തിന്റെ 2026-27 വാർഷിക ബജറ്റ് വൈസ് പ്രസിഡന്റ് പി.കെ. ബാലകൃഷ്ണൻ അവതരിപ്പിച്ചു. പ്രസിഡന്റ് സിന്ധു ബെന്നി അധ്യക്ഷത വഹിച്ചു. പഞ്ചായത്തിലെ 2025-26 വർഷത്തെ പദ്ധതികൾ പരമാവധി വേഗത്തിൽ പൂർത്തിയാക്കുകയും വരും വർഷത്തെ പ്രവർത്തനങ്ങൾ ജനങ്ങൾക്ക് ഏറെ ഉപകാരപ്പെടുന്ന രീതിയിലും സാമൂഹികവും സാമ്പത്തികവുമായ എല്ലാ മേഖലകളിലെയും ഉന്നമനം ലക്ഷ്യമാക്കി പുതിയ പദ്ധതികൾ ആവിഷ്കരിച്ചും സമഗ്രമായ പുരോഗതി മുന്നിൽകണ്ടുമുള്ളതാണ് ബജറ്റ്. കൃഷി, മൃഗപരിപാലനം, റോഡുകളുടെ നിർമാണം, സ്ത്രീകളുടെയും കുട്ടികളുടെയും ഉന്നമനം എന്നിവ ലക്ഷ്യമാക്കി അടിസ്ഥാന സൗകര്യങ്ങൾ വർധിപ്പിക്കുന്നതിനാവശ്യമായ നിർദ്ദേശങ്ങളും ഉൾപ്പെടുത്തിയിട്ടുണ്ട്. 26 കോടി 50 ലക്ഷം വരവും 25 കോടി ചെലവും ഒന്നരക്കോടി മിച്ചവും പ്രതീക്ഷിക്കുന്ന ബജറ്റാണ് അവതരിപ്പിച്ചിരിക്കുന്നത്.