ശ്രീകണ്ഠാപുരം വാർത്തകൾ

കരിന്തളം-വയനാട് 400 കെവി ലൈൻ: കത്തോലിക്ക കോൺഗ്രസ് പ്രക്ഷോഭത്തിലേക്ക്   ടവർ സ്ഥാപിക്കുന്ന സ്ഥലത്തിനും ലൈൻ കടന്നുപോകുന്ന സ്ഥലത്തിനും അതാത് പ്രദേശത്തെ വിപണിവില അടിസ്ഥാനമാക്കി കൃഷിഭൂമിക്കുളള നഷ്ടപരിഹാരം നൽകുവാൻ സർക്കാർ തയാറാകണം. 400 കെവി ലൈൻ കടന്നുപോകുന്ന കർണാടകയിലെ തരിശുഭൂമികൾക്ക് നൽകുന്ന നഷ്ടപരിഹാരമല്ല കേരളത്തിലെ കൃഷിഭൂമികൾ നഷ്ടപ്പെടുന്ന കർഷകർക്ക് നൽകേണ്ടത്. കേരള സർക്കാർ  കർഷകരെ സംരക്ഷിക്കുന്ന രീതിയിലുള്ള അടിസ്ഥാന പാക്കേജുകൾ പ്രഖ്യാപിക്കാൻ തയാറാകണം. കേരളത്തിലെ കർഷകരുടെ കൃഷിഭൂമി ഏറ്റെടുത്ത്  പദ്ധതികൾ നടപ്പാക്കുമ്പോൾ അതിനുള്ള  അർഹമായ നഷ്ടപരിഹാരം നൽകാതെ മറ്റ് സംസ്ഥാനങ്ങളിലെ പാക്കേജ് ചൂണ്ടിക്കാട്ടി കർഷകരെ വഞ്ചിക്കുന്ന ഇരട്ടത്താപ്പ് നയം കേരള സർക്കാർ തിരുത്തണം. 400 കെവി ലൈൻ കടന്നുപോകുന്ന കരിന്തളം മുതൽ വയനാട് വരെയുള്ള പ്രദേശങ്ങളിൽ കൃഷിഭൂമി നഷ്ടപ്പെടുന്ന കർഷകർക്ക് അർഹമായ നഷ്ടപരിഹാരം നൽകാൻ സർക്കാർ തയാറാകുന്നില്ലെങ്കിൽ കത്തോലിക്ക കോൺഗ്രസും  കർമസമിതിയോടൊപ്പം ചേർന്ന് ശക്തമായ പ്രക്ഷോഭം നടത്തുമെന്ന് കത്തോലിക്ക കോൺഗ്രസ് ഗ്ലോബൽ ഡയറക്ടർ റവ.ഡോ.ഫിലിപ്പ് കവിയിൽ  വ്യക്തമാക്കി. കത്തോലിക്ക കോൺഗ്രസ് തലശേരി അതിരൂപത പ്രസിഡൻ്റ് ഫിലിപ്പ് വെളിയത്ത്, ഗ്ലോബൽ ട്രഷറർ അഡ്വ.ടോണി ജോസഫ് പുഞ്ചക്കുന്നേൽ, ഫാ.പയസ് പടിഞ്ഞാറേമുറി, ജനറൽ സെക്രട്ടറി ജിമ്മി ആയിത്തമറ്റം, ട്രഷറർ സുരേഷ് കാഞ്ഞിരത്തിങ്കൽ, 400 കെവി ലൈൻ കടന്നുപോകുന്ന പ്രദേശങ്ങളിലെ പ്രതിനിധികളായി ജോർജ് കാനാട്ട്, ബെന്നിച്ചൻ മടത്തിനകം, ബെന്നി പുതിയാമ്പുറം, ഷാജു ഇടശേരി, തോമസ് വർഗീസ് വരമ്പുങ്കൽ, വർഗീസ് പള്ളിച്ചിറ, ബെന്നി ചേരിയ്ക്കത്തടത്തിൽ, ബിജു മണ്ഡപത്തിൽ, ബേബി കോയിക്കൽ, സാജു പുത്തൻപുര, സാജു പടിഞ്ഞാറേട്ട്, ജോണി തോലംപുഴ, സ്റ്റീഫൻ കീച്ചേരിക്കുന്നേൽ എന്നിവർ പ്രസംഗിച്ചു.  റിപ്പോർട്ടർ: തോമസ് അയ്യങ്കനാൽ