ശ്രീകണ്ഠാപുരം വാർത്തകൾ

തലശേരി: വടക്കേ മലബാറിലെ മലയോര മേഖലകളിൽ രൂക്ഷമായിക്കൊണ്ടിരിക്കുന്ന കാർഷിക വിളനാശത്തിന് ശാശ്വത പരിഹാരം കാണുക ലക്ഷ്യമിട്ട്, മണ്ണുത്തി മാതൃകയിൽ മലയോര മേഖലയിൽ ഒരു കാർഷിക സർവകലാശാല സ്ഥാപിക്കണമെന്ന് ആവശ്യപ്പെട്ട് കത്തോലിക്ക കോൺഗ്രസ് തലശേരി അതിരൂപത ഭാരവാഹികൾ എം.എൽ.എ സന്ദീപ് വാര്യർക്ക് നിവേദനം നൽകി. മലയോര കർഷകർ നേരിടുന്ന അതിതീവ്ര പ്രതിസന്ധികളും കാർഷിക മേഖലയിലെ തകർച്ചയും ചൂണ്ടിക്കാണിച്ചാണ് ഭാരവാഹികൾ ജനപ്രതിനിധിയെ സമീപിച്ചത്. കാലാവസ്ഥ വ്യതിയാനവും രോഗബാധകളും മൂലം വടക്കൻ കേരളത്തിലെ കർഷകർ വലിയ സാമ്പത്തിക നഷ്ടമാണ് നേരിടുന്നത്. ഇതിന് ശാസ്ത്രീയമായ പരിഹാരങ്ങൾ കണ്ടെത്താനും പ്രാദേശികമായ കാർഷിക ഗവേഷണങ്ങൾക്കും പദ്ധതികൾക്കുമായി മണ്ണുത്തി കാർഷിക സർവകലാശാലയുടെ മാതൃകയിലുള്ള ഒരു സംവിധാനം മലയോരത്ത് അനിവാര്യമാണെന്ന് നിവേദനത്തിൽ വ്യക്തമാക്കുന്നു. കർഷകരുടെ പ്രശ്നങ്ങൾക്ക് നിയമസഭയിലും സർക്കാരിന്റെ ശ്രദ്ധയിലും കാര്യമായ പിന്തുണ ഉറപ്പാക്കാമെന്ന് സന്ദീപ് വാര്യർ എം.എൽ.എ ഭാരവാഹികൾക്ക് ഉറപ്പുനൽകി. 🗞️📝 റിപ്പോർട്ടർ: തോമസ് അയ്യങ്കനാൽ