ശ്രീകണ്ഠാപുരം വാർത്തകൾ

പയ്യാവൂർ: നിരവധി പ്രതിസന്ധികൾ നേരിടേണ്ടിവരുന്ന സാഹചര്യത്തിൽ കർഷകർ റബർ കൃഷി ഉപേക്ഷിക്കാൻ നിർബന്ധിതരാകുകയാണ്. ടാപ്പിംഗ് തൊഴിലാളുടെ ക്ഷാമവും രാസവളങ്ങളുടെ വിലവർധനവും ലഭ്യതക്കുറവും റബർ കൃഷിയെ ഏറെ പ്രതികൂലമായി ബാധിച്ച അവസ്ഥയിലാണുള്ളത്. ആകർഷമായ പ്രതിഫലം നൽകുന്നതിലൂടെ യുവജനങ്ങളിൽ പഠനത്തോടൊപ്പം തൊഴിലും എന്ന ആശയം കൊണ്ടുവരാൻ സാധിക്കണം. ഇതര സബ്സിഡികളേക്കാൾ വിലസ്ഥിരതക്കാണ് പ്രാധാന്യം നൽകേണ്ടത്. റബറിൻ്റെ അടിസ്ഥാന വില കിലോഗ്രാമിന് മുന്നൂറ് രൂപയാക്കി ഇൻസെൻ്റീവ് അനുവദിച്ച് കർഷകരെ സഹായിക്കണമെന്ന് കാഞ്ഞിലേരി റബർ ഉത്പാദക സംഘം (ആർപിഎസ്) ജനറൽ ബോഡി യോഗം സർക്കാരിനോടാവശ്യപ്പെട്ടു. ശ്രീകണ്ഠപുരം റബർ ബോർഡ് റീജണൽ ഡെവലപ്പ്മെൻ്റ് ഓഫീസർ തോമസ് സക്കറിയ യോഗം ഉദ്ഘാടനം ചെയ്തു. ആർപിഎസ് പ്രസിഡൻ്റ് സ്കറിയ നെല്ലൻകുഴി അധ്യക്ഷത വഹിച്ചു. എഡിഒ ടി.കെ. ആൻസി, സ്റ്റീഫൻ ഊരാളിൽ, വിജയൻ മുല്ലപ്പള്ളി, കെ.പി. ഇസ്മായിൽ എന്നിവർ പ്രസംഗിച്ചു. കാർഷിക മേഖലയിലെ വിവിധ തലങ്ങളിൽ മികവ് തെളിയിച്ച പത്ത് കർഷകരെ ചടങ്ങിൽ ആദരിച്ചു. 🗞️📝 റിപ്പോർട്ടർ: തോമസ് അയ്യങ്കനാൽ