ശ്രീകണ്ഠാപുരം വാർത്തകൾ

പയ്യാവൂർ: പൊന്നുംപറമ്പ്, ഇരൂഡ്, ചമതച്ചാൽ എന്നീ നാളികേര ഉത്പാദക സംഘങ്ങളുടെ (സിപിഎസ്) സംയുക്താഭിമുഖ്യത്തിൽ വളപ്രയോഗം, പരിചരണം എന്നിവ സംബന്ധിച്ച് നാളികേര കർഷകർക്കായി സംഘടിപ്പിച്ച ബോധവത്കരണ സെമിനാർ കണ്ടകശേരി പാരിഷ് ഹാളിൽ നടന്നു. പൊന്നുംപറമ്പ് സിപിഎസ് പ്രസിഡന്റ് ജോൺ പൗവത്തേൽ അധ്യക്ഷത വഹിച്ചു. ഇരുഡ് സിപിഎസ് പ്രസിഡൻ്റ് സൈമൺ പാഴുക്കുന്നേൽ, ചമതച്ചാൽ സിപിഎസ് പ്രസിഡൻ്റ് ബിജി പുതുപറമ്പിൽ എന്നിവർ പ്രസംഗിച്ചു. പയ്യാവൂർ കൃഷിഭവൻ അസിറ്റൻ്റ് കൃഷി ഓഫീസർ രമേശൻ ക്ലാസെടുത്തു. നൂറോളം നാളികേര കർഷകരാണ് സെമിനാറിൽ പങ്കെടുത്തത്. വിലത്തകർച്ചയിലും തെങ്ങ് കൃഷിയെ എങ്ങനെ സംരക്ഷിക്കാമെന്ന് സെമിനാറിലൂടെ കർഷകരെ ബോധ്യപ്പെടുത്തി. ▪️ റിപ്പോർട്ടർ: തോമസ് അയ്യങ്കനാൽ