ശ്രീകണ്ഠാപുരം വാർത്തകൾ

ഇരിക്കൂർ: അന്താരാഷ്ട്ര ലഹരിവിരുദ്ധ ദിനാചരണത്തോടനുബന്ധിച്ചും ലഹരിവിരുദ്ധ ക്യാമ്പയിനായ ‘ഓപ്പറേഷൻ തൂഫാൻ്റെ’ ഭാഗമായും ഇരിക്കൂർ ബ്ലോക്ക് പഞ്ചായത്തിന്റെ നേതൃത്വത്തിൽ ലഹരിവിരുദ്ധ ബോധവൽക്കരണ ക്ലാസും പെനാൾട്ടി ഷൂട്ട് ഔട്ട് മത്സരവും സംഘടിപ്പിച്ചു. ബ്ലോക്ക് പഞ്ചായത്ത് ഹാളിൽ നടന്ന പരിപാടിയുടെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്റ് ടി. കെ. സുലേഖ നിർവഹിച്ചു. ചടങ്ങിൽ ബ്ലോക്ക് പഞ്ചായത്ത് വൈസ് പ്രസിഡന്റ് കെ. വി. അബ്ദുൽ റഹ്മാൻ അധ്യക്ഷത വഹിച്ചു. ലഹരിയുടെ ഉപയോഗത്തിനെതിരെ പൊതുസമൂഹത്തിൽ, പ്രത്യേകിച്ച് യുവാക്കൾക്കിടയിൽ ശക്തമായ ബോധവൽക്കരണം ഉറപ്പാക്കുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്. ഇതിന്റെ ഭാഗമായി നടന്ന പെനാൾട്ടി ഷൂട്ട് ഔട്ട് മത്സരം ശ്രദ്ധേയമായി. ബ്ലോക്ക് പഞ്ചായത്ത് ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ ബി. ഷംസുദ്ദീൻ, ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ പി. സൗമിനി ടീച്ചർ, ബ്ലോക്ക് പഞ്ചായത്ത് മെമ്പർമാരായ യു. പി. അബ്ദു റഹ്മാൻ, എമീമ രാജേഷ്, യു. ലക്ഷ്മണൻ, ബ്ലോക്ക് പഞ്ചായത്ത് സെക്രട്ടറി പ്രവീൺ വി. വി എന്നിവരും വിവിധ വകുപ്പ് ജീവനക്കാരും പരിപാടിയിൽ പങ്കെടുത്തു.