ശ്രീകണ്ഠാപുരം വാർത്തകൾ

ചെമ്പേരി: ലൂർദ് മാതാ ബസിലിക്കയുടെ ആഭിമുഖ്യത്തിൽ പുറഞ്ഞാണിലുള്ള ഉണ്ണിമിശിഹാ കപ്പേളയിൽ മൂന്ന് ദിവസത്തെ തിരുനാൾ ആഘോഷങ്ങൾക്ക് കൊടിയേറി, വൈകുന്നേരം അഞ്ചിന് ചെമ്പേരി ബസിലിക്ക റെക്ടർ റവ.ഡോ. ജോർജ് കാഞ്ഞിരക്കാട്ട് കൊടിയേറ്റി.തുടർന്ന് വിശുദ്ധ കുർബാന, നൊവേന എന്നിവയ്ക്ക് കോട്ടക്കുന്ന് പയസ്മൗണ്ട് ആശ്രമം സുപ്പീരിയർ ഫാ. തോമസ് കണിയാംകുന്നേൽ നേതൃത്വം നൽകി. രണ്ടാം ദിനം ആയ ഇന്ന് വൈകുന്നേരം അഞ്ചിന് വിശുദ്ധ കുർബാന, നൊവേന എന്നിവയ്ക്ക് കോതമംഗലം മൗണ്ട് കാർമൽ കോളജ് ഫിനാൻസ് അഡ്‌മിനിസ്ട്രേറ്റർ ഫാ. എബിൻ വഴക്കുഴ നേതൃത്വം നൽകും. ഞായറാഴ്ച വൈകുന്നേരം അഞ്ചിന് ആഘോഷമായ തിരുനാൾ കുർബാനയ്ക്ക് കനകക്കുന്ന് മേഴ്സിഫുൾ ജീസസ് തീർഥാടന പള്ളി വികാരി ഫാ. കുര്യാക്കോസ് പന്തല്ലൂപ്പറമ്പിൽ മുഖ്യകാർമികത്വം വഹിക്കും. ഏഴിന് വേങ്കുന്ന് ഭാഗത്തേക്ക് ദീപാലംകൃതമായ തിരുനാൾ പ്രദക്ഷിണം ഉണ്ടായിരിക്കും. രാത്രി എട്ടിന് തലശേരി റോക്ക് സ്റ്റാർ അവതരിപ്പിക്കുന്ന ‘മ്യൂസിക്കൽ നൈറ്റ്’ അരങ്ങേറും.