ശ്രീകണ്ഠാപുരം വാർത്തകൾ

മലപ്പട്ടം: അടിച്ചേരി ഗ്രാമത്തിലെ കുട്ടികൾക്ക് ഒത്ത് ചേരാനും  അവരുടെ കായിക വിനോദത്തിനും വേണ്ടി ഒരു കളിസ്ഥലത്തിനായി  ഭൂമി വാങ്ങാൻ നാടൊന്നാകെ ആവേശപൂർവം നടത്തുന്ന പരിശ്രമങ്ങൾ ശ്രദ്ധേയമാകുന്നു. മലപ്പട്ടം അടിച്ചേരിയിൽ 1957 ൽ പ്രവർത്തനമാരംഭിച്ച കൃഷ്ണപിള്ള സ്മാരക വായനശാലക്കായി മുൻ എംപി കെ.കെ.രാഗേഷ് അനുവദിച്ച തുക ഉപയോഗിച്ച് നിർമിച്ച പുതിയ കെട്ടിടം ഉദ്ഘാടനത്തിനൊരുങ്ങുന്നതിനിടയിലാണ് കളിസ്ഥലത്തിനാവശ്യമായ ധനസമാഹരണത്തിനു വേണ്ടി പരസ്പര സഹായ നിധി എന്ന പേരിൽ നാട്ടുകാരുടെ സഹകരണത്തോടെ വായനശാല കമ്മിറ്റി രംഗത്തിറങ്ങിയിരിക്കുന്നത്. വരും തലമുറയിലെ കുട്ടികളുടെ കായികപരിശീലനം ലക്ഷ്യമാക്കിയുള്ള ഈ മാതൃകാ പ്രവർത്തനത്തിന് വളരെനല്ല സഹകരണമാണ് ലഭിക്കുന്നത്. ഒരു സെൻ്റ് സ്ഥലം എന്ന ചലഞ്ച് പ്രകാരം 45 സെൻ്റ് സ്ഥലം കളിസ്ഥലത്തിനായി ഇതിനകം തന്നെ വായനശാല പ്രവർത്തകരുടെ ശ്രമഫലമായി വാങ്ങിയിട്ടുണ്ട്. കളിസ്ഥലത്തിനാവശ്യമായ ബാക്കി സ്ഥലം കൂടി വാങ്ങുന്നതിനാണ് പരസ്പര സഹായ നിധിയെന്ന പേരിൽ കുറി തുടങ്ങിയത്. പൊതുജനങ്ങളിൽ നിന്ന് ആവേശകരമായ പ്രതികരണങ്ങളാണ് ഈ കുറിക്ക് ലഭിച്ചുകൊണ്ടിരിക്കുന്നതെന്ന് വായനശാല ഭാരവാഹികൾ പറയുന്നു. പഞ്ചായത്ത് മെംബർ കെ.വി.സുധാകരൻ കൺവീനറും, പി.വാസന്തി ചെയർമാനും വായനശാല പ്രസിഡൻ്റ് എം.വി പുരുഷോത്തമൻ, സെക്രട്ടറി അയത്ത് ലക്ഷ്മണൻ എന്നിവർ ഉൾപ്പെടുന്ന അമ്പത്തൊന്നംഗ സംഘാടക സമിതിയാണ് ഇതിന് വേണ്ടി പ്രവർത്തിച്ചുവരുന്നത്.    ▪️ റിപ്പോർട്ടർ: തോമസ് അയ്യങ്കനാൽ