ശ്രീകണ്ഠാപുരം വാർത്തകൾ

ചെമ്പേരി: അരനൂറ്റാണ്ട് മുമ്പ് ചെമ്പേരി നിർമല ഹൈസ്കൂളിൽ 1975 എസ്എസ്എൽസി ബാച്ചിലെ സഹപാഠികളായിരുന്നവരുടെ കൂട്ടായ്മ ‘തിരികെ’  ഒത്തുചേർന്ന് ഈ വർഷം എസ്എസ്എൽസി പരീക്ഷ എഴുതുന്ന വിദ്യാർത്ഥികൾക്ക് സ്നേഹാദരങ്ങളോടെ യാത്രയയപ്പ് നൽകി. വിദ്യാർത്ഥികൾക്ക് മധുരം നൽകി ലഹരിക്കെതിരെ പ്രതിജ്ഞയും ചൊല്ലി. ‘ഗാന്ധിസമാകട്ടെ പുതിയ തലമുറയുടെ ലഹരി’ എന്ന സന്ദേശമാണ് പഴയ സഹപാഠികൾ പുതിയ ബാച്ചിലെ വിദ്യാർത്ഥികൾക്ക് നൽകിയത്. പ്രശസ്ത ചിത്രകാരനും കേരള ലളിതകലാ അക്കാദമി സെക്രട്ടറിയുമായ എബി എൻ.ജോസഫ്  വരച്ച ഗാന്ധിജിയുടെ മനോഹരമായ ചിത്രവും സ്കൂളിന് കെെമാറി.  ചെമ്പേരി നിർമല സ്കൂൾ ഹാളിൽ നടന്ന ചടങ്ങ് ഹയർ സെക്കൻഡറി പ്രിൻസിപ്പൽ സി.ഡി.സജീവ് ഉദ്ഘാടനം ചെയ്തു. ഹൈസ്കൂൾ മുഖ്യാധ്യാപകൻ എം.ജെ. ജോർജ് അധ്യക്ഷത വഹിച്ചു. സ്കൂൾ ലീഡർ സാനിയ അനു സാബു വിദ്യാർത്ഥികൾക്ക് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. വിനോദ് അഗസ്റ്റിൻ, സിബി കുഴിവേലിപ്പുറം,ഡി.പി.ജോസ് , ദേവസ്യ ആന്റണി ഇടിമണ്ണിയ്ക്കൽ, ബേബി ജേക്കബ് വാഴക്കാമല, എബ്രാഹം മാത്യു, ചെമ്പേരി നിർമല ആഗോള കൂട്ടായ്മയുടെ മിഡിൽ ഈസ്റ്റ്‌ കോഓർഡിനേറ്റർ പയസ് ചാലിൽ എന്നിവർ സംസാരിച്ചു.മോൺ.മാത്യു എം.ചാലിൽ ഫൗണ്ടേഷൻ സ്കൂളിന് സമ്മാനിക്കുന്ന ഗാന്ധിജിയുടെ ചിത്രവും, ‘ചാലിലച്ചൻ മലബാറിന്റെ കർമയോഗി’ എന്ന പുസ്തകവും  മോൺ.മാത്യു എം. ചാലിൽ ഫൗണ്ടേഷൻ പ്രസിഡൻ്റ് പയസ് ചാലിൽ സ്കൂളിന് കൈമാറി.  ▪️ റിപ്പോർട്ടർ: തോമസ് അയ്യങ്കനാൽ