ശ്രീകണ്ഠാപുരം വാർത്തകൾ

പയ്യാവൂർ: കുടിയൻമല ഫാത്തിമ യുപി സ്കൂളിന്റെ  അറുപത്തഞ്ചാമത് വാർഷികാഘോഷവും സർവീസിൽ നിന്ന് വിരമിക്കുന്ന മുഖ്യാധ്യാപിക ഇ.ജെ.ലൈലക്കുള്ള യാത്രയയപ്പ് സമ്മേളനവും സ്കൂൾ ഓഡിറ്റോറിയത്തിൽ നടന്നു. ആർച്ച് ബിഷപ്പ് എമരിറ്റസ് മാർ ജോർജ് ഞറളക്കാട്ട് സമ്മേളനം ഉദ്ഘാടനം ചെയ്തു. തലശേരി അതിരൂപത കോർപ്പറേറ്റ് വിദ്യാഭ്യാസ ഏജൻസി മാനേജർ ഫാ.മാത്യു ശാസ്താംപടവിൽ അധ്യക്ഷത വഹിച്ചു. സ്കൂൾ സീനിയർ അസിസ്റ്റന്റ്  സിനോബി തോമസ് ആമുഖ പ്രഭാഷണവും സ്കൂൾ മാനേജരും കുടിയാന്മല ഇടവക വികാരിയുമായ ഫാ.പോൾ വള്ളോപ്പിള്ളിൽ അനുഗ്രഹ പ്രഭാഷണവും ഇരിക്കൂർ ഉപജില്ല വിദ്യാഭ്യാസ ഓഫീസർ പി.കെ.ഗിരീഷ് മോഹൻ മുഖ്യപ്രഭാഷണവും നടത്തി. മുഖ്യാതിഥിയായി പങ്കെടുത്ത സജീവ് ജോസഫ് എംഎൽഎ ഭാഷാമൃതം പദ്ധതിയിൽ വിജയികളായ വിദ്യാർത്ഥികൾക്ക് കമ്പ്യൂട്ടറുകൾ സമ്മാനിച്ചു. വിരമിക്കുന്ന മുഖ്യാധ്യാപിക ഇ.ജെ. ലൈലയുടെ 26 വർഷത്തെ സേവനം അനുസ്മരിക്കുന്ന വീഡിയോ പ്രസന്റേഷനെ തുടർന്ന് ഇ.ജെ.ലൈല തൻ്റെ സ്കൂൾ അനുഭവങ്ങൾ പങ്കുവച്ചു. സ്റ്റാഫംഗങ്ങളും പിടിഎ യും ചേർന്ന് ഉപഹാരസമർപ്പണം നടത്തി. കുടിയാന്മല മേരി ക്യൂൻസ് ഹൈസ്കൂൾ മുഖ്യാധ്യാപകൻ സുനിൽ ജോസഫ്, ഏരുവേശി  ഗ്രാമപഞ്ചായത്ത് പ്രസിഡന്റ് മിനി ഷൈബി, വാർഡ് മെംബർ ഷൈല ജോയ്, സ്കൂൾ സ്റ്റാഫ് സെക്രട്ടറി അൻസ ജോർജ് എന്നിവർ പ്രസംഗിച്ചു. ഫാത്തിമ യുപി സ്കൂളിലെ ഗായകസംഘം ആശംസാ ഗാനം ആലപിച്ചു. വിദ്യാർത്ഥികളുടെ വിവിധ കലാപരിപാടികളും നടന്നു.   ▪️ റിപ്പോർട്ടർ: തോമസ് അയ്യങ്കനാൽ