ശ്രീകണ്ഠാപുരം വാർത്തകൾ

പയ്യാവൂർ: കഴിഞ്ഞ ദിവസങ്ങളിൽ പള്ളിയിലെ കുമ്പസാരക്കൂട്ടിൽ നിന്നും തിരുവസ്ത്രം നഷ്ടപ്പെട്ട സംഭവത്തിൽ വിശ്വാസികളുടെ വിഷമത്തിൽ പങ്കുചേരുന്നതായി നേതാക്കൾ അറിയിച്ചു.ഇരിക്കൂർ ഉപജില്ല സ്കൂൾ കലോത്സവത്തിൽ എത്തിച്ചേർന്ന വിദ്യാർത്ഥികൾ കൃത്യമായ അച്ചടക്കം പാലിച്ചിട്ടുണ്ടോയെന്ന് ഉറപ്പ് വരുത്തേണ്ടത് അതത് സ്കൂളുകളിലെ അധ്യാപകരുടെയും, പിടിഎ കമ്മിറ്റിയുടെയും ചുമതലയാണെന്നും കലോൽസവ വേദികളിൽ വിദ്യാർത്ഥികൾ തമ്മിൽ ഏതെങ്കിലും തരത്തിലുള്ള വാക്ക് തർക്കങ്ങളോ സംഘർഷങ്ങളോ ഉണ്ടായിട്ടുണ്ടെങ്കിൽ ആയതിൻ്റെ പരിപൂർണ ഉത്തരവാദിത്വം അതത് സ്കൂളുകളിലെ അധ്യാപകരുടെയും പിടിഎ കമ്മിറ്റിയുടെയുമാണെന്നും, ഇത്തരം സംഘർഷങ്ങളിൽ ഏർപ്പെടുന്നവർക്കെതിരെ ശക്തമായ നിയമ നടപടികൾ പോലീസ് സ്വീകരിക്കണമെന്നും നേതാക്കൾ ആവശ്യപ്പെട്ടു. കലോത്സവത്തോടനുബന്ധിച്ച് ചെറുപുഷ്പം യുപി സ്കൂളിൽ സാമൂഹിക ദ്രോഹികൾ നശിപ്പിച്ച  വസ്തുവകകൾ പുനർനിർമ്മിക്കുന്നതിന്  ഉത്തരവാദിത്വപ്പെട്ടവർ നടപടി സ്വീകരിക്കണമെന്നും സംഘം ആവശ്യപ്പെട്ടു. സ്കൂൾ കലോത്സവത്തിൽ സംഘർഷം ഉണ്ടായപ്പോൾ  വേണ്ടത്ര പോലീസ് ഉദ്യോഗസ്ഥർ സ്ഥലത്ത് ഉണ്ടായിരുന്നോ എന്നും, വേണ്ടത്ര ജാഗ്രത പുലർത്തിയോ എന്നും പരിശോധിക്കണം. ഈ മേഖലയിലെ കച്ചവട സ്ഥാപനങ്ങളിലെ മയക്കുമരുന്ന് വില്പന കണ്ടുപിടിച്ച് അത് നിർത്തലാക്കണമെന്നും, ചെമ്പന്തൊട്ടി ടൗണിലും സ്കൂൾ പരിസരത്തും ശ്രീകണ്ഠപുരം നഗരസഭ അടിയന്തരമായി കാമറകൾ സ്ഥാപിക്കണമെന്നും നേതാക്കൾ പറഞ്ഞു. കേരള കോൺഗ്രസ്-എം സംസ്ഥാന ജനറൽ സെക്രട്ടറി സജി കുറ്റ്യാനിമറ്റം, ജില്ലാ സെക്രട്ടറി സി.ജെ.ജോൺ, ഇരിക്കൂർ നിയോജകമണ്ഡലം പ്രസിഡൻ്റ് ബിജു പുതുക്കള്ളി, ബിനു ഇലവുങ്കൽ, സണ്ണി മുക്കുഴി, ചെമ്പന്തൊട്ടി മണ്ഡലം പ്രസിഡൻ്റ് ഷാജി കുറ്റ്യാത്ത്, ബാബു തയ്യിൽ, ജോണി ഉറുമ്പുകാട്ടിൽ എന്നിവരാണ് വികാരിയെ സന്ദർശിച്ച സംഘത്തിൽ ഉണ്ടായിരുന്നത് ▪️ റിപ്പോർട്ടർ: തോമസ് അയ്യങ്കനാൽ