ശ്രീകണ്ഠാപുരം വാർത്തകൾ

കണ്ണൂർ ∙ സ്പെഷൽ സമ്മറി റിവിഷൻ 2025 ഭാഗമായി ഇന്നു മുതൽ 24 വരെ താലൂക്ക്, വില്ലേജ് തലത്തിൽ സ്പെ‌ഷൽ ക്യാംപയിൻ സംഘടിപ്പിക്കുമെന്ന് കലക്ടർ അറിയിച്ചു. ഗോത്ര വിഭാഗക്കാരുള്ള സ്ഥലങ്ങളിൽ ബൂത്ത് തലത്തിലും ക്യാംപയിൻ ഉണ്ടാകും. *17 വയസ്സ് പൂർത്തിയായ എല്ലാവർക്കും വോട്ടർ പട്ടികയിൽ പേര് ചേർക്കുന്നതിന് മുൻകൂറായി അപേക്ഷ സമർപ്പിക്കാനും 2025 ജനുവരി ഒന്നിന് 18 വയസ്സ് പൂർത്തീകരിക്കുന്നവർക്ക് വോട്ടർ പട്ടികയിൽ പേര് ചേർക്കാനുള്ള സൗകര്യം* വില്ലേജ്, താലൂക്ക് ഓഫിസുകളിൽ ഏർപ്പെടുത്തിയിട്ടുണ്ട്. വോട്ടർപട്ടിക പരിശോധിക്കാൻ അവസരവും ഉണ്ട്. പരിശോധനയിൽ ആരെയെങ്കിലും ഒഴിവാക്കിയതായി കണ്ടാൽ, അർഹരായവരെ വീണ്ടും പട്ടികയിൽ ഉൾപ്പെടുത്തുന്നതിന് ഫോറം ആറിൽ അപേക്ഷ സമർപ്പിക്കുന്നതിനുള്ള സഹായവും ലഭിക്കും. വോട്ടർ പട്ടികയിൽ പേര് ചേർക്കുന്നതിനും തിരുത്തുന്നതിനും ഒഴിവാക്കുന്നതിനും സിഇഒ വെബ്‌സൈറ്റ് (https://www.eci.gov.in/), വോട്ടർ ഹെൽപ് ലൈൻ ആപ്പ്, എൻവിഎസ്പി (https://voters.eci.gov.in/) എന്നിവ പ്രയോജനപ്പെടുത്താം. സ്‌പെഷൽ സമ്മറി റിവിഷൻ 2025 ഭാഗമായി 28 വരെ വോട്ടർ പട്ടികയിൽ പേര് ചേർക്കാം. അന്തിമ വോട്ടർ പട്ടിക 2025 ജനുവരി 6 ന് പ്രസിദ്ധീകരിക്കും.