ശ്രീകണ്ഠാപുരം വാർത്തകൾ

ചെമ്പേരി: ഇന്നത്തെ യുവ തലമുറ ലഹരിവസ്തുക്കൾക്ക്‌ അടിമപ്പെടുന്നത് കയ്യുംകെട്ടി നോക്കി നിൽക്കാൻ ഈ സമൂഹത്തിന് കഴിയില്ലെന്നും, അവരെ രക്ഷിക്കാൻ യുവജന കൂട്ടായ്മകളൊരുക്കി മദ്യവിരുദ്ധ പ്രസ്ഥാനങ്ങൾ മുന്നോട്ടു പോകുമെന്നും യോഗം മുന്നറിയിപ്പ് നൽകി. മദ്യ മേഖലയിൽ സർക്കാരിന് തോന്നുംപടി പ്രവർത്തിക്കുവാനുള്ള ലൈസൻസ് ആയി മാത്രമേ ഇപ്പോഴത്തെ മദ്യ വില്പനയെ  കണക്കാക്കാൻ സാധിക്കുകയുള്ളു. പുതിയ ബാറുകൾക്ക് അനുമതി നൽകുന്നതിലും യഥേഷ്ടം  മദ്യശാലകൾ അനുവദിക്കുന്നതിനും സർക്കാർ കാണിക്കുന്ന  താല്പര്യം മദ്യവിരുദ്ധ പ്രവർത്തനങ്ങൾക്ക് എതിരായുള്ളതാണ്. ജനത്തിന്റെ ജീവനും സ്വത്തും ആരോഗ്യവും നിലനിർത്താൻ ആവശ്യമായ നടപടികൾ സ്വീകരിക്കുന്നതിനുപകരം ഖജനാവ് നിറയ്ക്കാൻ നോക്കുന്ന ഈ ജനദ്രോഹം ഇനിയും അനുവദിക്കാനാകില്ല. അതിനാൽ സർക്കാർ പുതിയ മദ്യനയം പ്രഖ്യാപിച്ച് മദ്യം, മയക്കുമരുന്നുകൾ എന്നിവക്കെതിരെ കർശനമായ നിയമസംവിധാനങ്ങൾ ഏർപ്പെടുത്തണമെന്നും യോഗം ആവശ്യപ്പെട്ടു. ചെമ്പേരി അൽഫോൻസ ഓഡിറ്റോറിയത്തിൽ നടന്ന കെസിബിസി മദ്യവിരുദ്ധ സമിതി മുക്തിശ്രീ തലശേരി അതിരൂപത കമ്മിറ്റി യോഗം ചെമ്പേരി ലൂർദ് മാതാ ബസിലിക്ക റെക്ടർ റവ.ഡോ.ജോർജ് കാഞ്ഞിരക്കാട്ട് ഉദ്ഘാടനം ചെയ്തു. മദ്യവിരുദ്ധ സമിതി അതിരൂപത പ്രസിഡന്റ് ടോമി വെട്ടുകാട്ടിൽ അധ്യക്ഷത വഹിച്ചു. അതിരൂപത ഡയറക്ടർ ഫാ.ജോസഫ് പൂവത്തോലിൽ അനുഗ്രഹ പ്രഭാഷണവും, ചെമ്പേരി ബസിലിക്ക അസിസ്റ്റന്റ് റെക്ടർ ഫാ.അമൽ ചെമ്പകശേരി, മുക്തിശ്രീ അതിരൂപത പ്രസിഡന്റ് ഷിനോ സിബി പാറയ്ക്കൽ, അതിരൂപത ആനിമേറ്റർ സിസ്റ്റർ ജോസ് മരിയ, ടി.ഡി.ദേവസ്യ, സോളി രാമച്ചനാട്ട്, സോയി ജോസഫ് പുറക്കാട്ട്, ഷെൽസി കാവനാടി, പൈലി വലിയ കണ്ടം, പുഷ്പ വെള്ളാപ്പാടം എന്നിവർ പ്രസംഗിച്ചു. ജോസ് ശാശേരി, വിൻസെന്റ് മുണ്ടാട്ടുചുണ്ടയിൽ, സെബാസ്റ്റ്യൻ പെരുമ്പുഴ, ജോസ് ചിറ്റേട്ട്, തങ്കമ്മ പാലമറ്റം, ജിൻസി കുഴിമുള്ളിൽ, മോളി സജി, സിനി കൊച്ചുപുറത്താനത്ത്, ജോളി ബിജു നടുതൊട്ടിയിൽ  എന്നിവർ നേതൃത്വം നൽകി.   ▪️ റിപ്പോർട്ടർ: തോമസ് അയ്യങ്കനാൽ