ശ്രീകണ്ഠാപുരം വാർത്തകൾ

പയ്യാവൂർ: ചാമക്കാൽ എസ്എൻ യുപി സ്കൂളിൽ കേരളപ്പിറവി ദിനാചരണത്തോടനുബന്ധിച്ച് ‘വിത്തും കൈക്കോട്ടും’ എന്ന പേരിൽ വിവിധ തരം വിത്തുകൾ, പഴയകാല കാർഷികോപകരണങ്ങൾ എന്നിവയുടെ പ്രദർശനം നടന്നു. വിദ്യാർത്ഥികളുടെയും രക്ഷിതാക്കളുടെയും ജീവനക്കാരുടെയും സഹകരണത്തോടെയാണ് പ്രദർശനം സംഘടിപ്പിച്ചത്. ഞേങ്ങോൽ, കവിഞ്ചി, വേര്മാച്ചി, പറ, സേർ, ആവണിപ്പലക, വിത്തൂട്ടി, ഉടുപ്പുപെട്ടി, മരി എന്നിവയുൾപ്പെടെ ഒട്ടേറെ മുൻകാല ഉപകരണങ്ങൾ വിദ്യാർത്ഥികൾക്കും അധ്യാപകർക്കും പരിചയപ്പെടാൻ സാധിച്ചു. വിദ്യാർത്ഥികളിൽ കാർഷിക സംസ്കാരം വളർത്തുക എന്ന ലക്ഷ്യത്തോടെ 2024-.25 വർഷത്തെ മികവ് പ്രവർത്തനങ്ങളുടെ ഭാഗമായാണ് വിത്തും കൈക്കോട്ടും പ്രദർശനം നടത്തിയത്. പയ്യാവൂർ ഗ്രാമപഞ്ചായത്ത് പ്രസിഡന്റ് സാജു സേവ്യർ ഉദ്ഘാടനം ചെയ്തു. സ്കൂൾ മാനേജർ പി.എം.ജയരാജ് അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്റ് പ്രീത സുരേഷ് സ്കൂളിനെ ഹരിത വിദ്യാലയമായി പ്രഖ്യാപിച്ചു. വാർഡ് മെംബർ പ്രഭാവതി മോഹനൻ, ചാമക്കാൽ ഗവ.എൽപിഎസ്  മുഖ്യാധ്യാപകൻ ഇ. പി ജയപ്രകാശ്, മദർ പിടിഎ പ്രസിഡന്റ് ഷീബ ബിജു, എം.ഷീജ, എ.കെ.ആശ, പി.സ്മിത, പി.കെ.ഹോളി, ബ്രിജില കെ.രാജൻ, സ്കൂൾ ലീഡർ സ്നേഹ സന്തോഷ്‌, വനജ വിജയൻ എന്നിവർ സംസാരിച്ചു   ▪️ റിപ്പോർട്ടർ: തോമസ് അയ്യങ്കനാൽ