ശ്രീകണ്ഠാപുരം വാർത്തകൾ

പയ്യാവൂർ: ചെമ്പന്തൊട്ടി നായനാർ മലയിൽ പ്രദേശവാസികളുടെ സ്വൈര്യ ജീവിതത്തിന് ഭിഷണിയായ കരിങ്കൽ ക്വാറിയുടെ പ്രവർത്തനം പൂർണമായും നിരോധിക്കാൻ ആദ്യഘട്ട നടപടി സ്വീകരിച്ചതായി ശ്രീകണ്ഠപുരം നഗരസഭാധ്യക്ഷ ഡോ.കെ.വി.ഫിലോമിന  ഇന്നലെ (ചൊവ്വ) നഗരസഭാ ഹാളിൽ ചേർന്ന  കൗൺസിലിൽ യോഗത്തിൽ അറിയിച്ചു. പ്രദേശത്തെ ജനപ്രതിനിധി എന്ന നിലയിൽ നാലാം വാർഡ് കൗൺസിലറായ കെ.ജെ. ചാക്കോ കൊന്നയ്ക്കൽ ഈ ക്വാറിയുടെ പ്രവർത്തനം നിർത്തിവയ്ക്കാൻ നടപടി വേണമെന്ന് മുൻ കൗൺസിൽ യോഗങ്ങളിൽ ശക്തമായി ആവശ്യപ്പെട്ടിരുന്നു. ഇതേ തുടർന്ന് നഗരസഭാ സെക്രട്ടറി ക്വാറിക്ക് സ്റ്റോപ്പ് മെമ്മോ നൽകിയിരുന്നെങ്കിലും അതിനുശേഷം എന്ത് നടപടി സ്വീകരിച്ചു എന്ന കൗൺസിലറുടെ ചോദ്യത്തിന് മറുപടിയായാണ് ഇക്കാര്യം അറിയിച്ചത്. ക്വാറി പ്രവർത്തിപ്പിക്കുന്നതിലെ നീയമലംഘനങ്ങൾ ചൂണ്ടിക്കാട്ടി എഴ് ദിവസത്തിനുള്ളിൽ മറുപടി ആവശ്യപ്പെട്ട് ക്വാറി ഉടമക്ക് നോട്ടീസ് നൽകിയിട്ടുണ്ടെന്നും  മറുപടി കിട്ടിയാലുടൻ നയനാർ മലയിലെ മുളിയാൻ ക്വാറിയുടെ പ്രവർത്തനം എന്നന്നേക്കുമായി നിരോധിക്കാൻ പഴുതുകളില്ലാത്ത നടപടി സ്വീകരിക്കുമെന്നുമാണ് നഗരസഭാധ്യക്ഷയും നഗരസഭാ സെക്രട്ടറിയും വ്യക്തമാക്കിയിട്ടുള്ളത്. ഈ മറുപടി ജനകീയ കമ്മിറ്റിക്കു വേണ്ടി സ്വാഗതം ചെയ്യുന്നതായും ഈ ക്വാറിയുടെ പ്രവർത്തനം ഇല്ലാതാകുംവരെ ജാഗ്രതയോടെ വിശ്രമമില്ലാതെ പോരാടുമെന്നും ജനകീയ കമ്മിറ്റി ഭാരവാഹികളായ കെ.ജെ.ചാക്കോ കൊന്നയ്ക്കൽ, വർഗീസ് വയലാമണ്ണിൽ, കെ.എം.ഷംസീർ എന്നിവർ അറിയിച്ചു. ▪️ റിപ്പോർട്ടർ: തോമസ് അയ്യങ്കനാൽ