ശ്രീകണ്ഠാപുരം വാർത്തകൾ

പയ്യാവൂർ: ക്രിയേറ്റീവ് ഫോട്ടോകളുടെയും പഴയ കാമറകൾ, ഉപകരണങ്ങൾ എന്നിവയുടെയും പ്രദർശനം മണിക്കടവ് സെൻ്റ് തോമസ് ഹയർ സെക്കൻഡറി സ്കൂളിൽ നടന്നു. കണ്ണൂർ ക്രിയേറ്റീവ് ഫോട്ടോഗ്രാഫേഴ്സ് ഫോറം, മണിക്കടവ് സ്കൂൾ എൻഎസ്എസ് യൂണിറ്റ് എന്നിവരുടെ സംയുക്താഭിമുഖ്യത്തിലാണ് പ്രദർശനം സംഘടിപ്പിച്ചത്. സ്കൂൾ മാനേജർ ഫാ.പയസ് പടിഞ്ഞാറെമുറിയിൽ ഉദ്ഘാടനം ചെയ്തു. വിദ്യാർത്ഥികളുടെ സർഗാത്മകത വളർത്തുന്നതിന് ഇത്തരം പരിപാടികൾ ഉപകരിക്കുമെന്ന് അദ്ദേഹം പറഞ്ഞു. സ്കൂൾ പ്രിൻസിപ്പൽ ഷാജി വർഗീസ് ആമുഖപഭാഷണം നടത്തി. ക്രിയേറ്റീവ് ഫോട്ടോഗ്രാഫേഴ്സ് ഫോറം പ്രസിഡൻ്റ് കുടിയാന്മല ഗോപാലൻ ‘സർഗാത്മക ഫോട്ടോഗ്രഫിയും ആസ്വാദനവും’ എന്ന വിഷയത്തിൽ ബോധവത്കരന്ന ക്ലാസ് നയിച്ചു. സ്കൂൾ എൻഎസ്എസ് യൂണിറ്റ് പ്രാേഗ്രാം ഓഫീസർ കെ.ആർ.സുധീഷ് പ്രസംഗിച്ചു. ഫോട്ടാേഗ്രാഫർമാരായ തോമസ് ചെമ്പേരി, സിബി വെള്ളരിക്കുണ്ട്, അശോകൻ പുറച്ചേരി, വിജേഷ് കണ്ണൂർ എന്നിവർ പങ്കെടുത്തു. ഫോട്ടോ പ്രദർശനം വിദ്യാർത്ഥികളിൽ ആസ്വാദനത്തിൻ്റെ നവ്യാനുഭവം പകർന്നു നൽകി. സ്കൂൾ സ്റ്റാഫ് സെക്രട്ടറി റിജോ ചാക്കോ, സീനിയർ അസിസ്റ്റൻ്റ് പി.എ.പ്രസാദ് എന്നിവർ നേതൃത്വം നൽകി.  റിപ്പോർട്ടർ: തോമസ് അയ്യങ്കനാൽ