ശ്രീകണ്ഠാപുരം വാർത്തകൾ

പയ്യാവൂർ: കേരള സർക്കാർ അനാഥ-അഗതി ദിനമായി ആചരിച്ചുവരുന്ന വിശുദ്ധ മദർ തെരേസയുടെ ജന്മദിനമായ ഇന്ന് സാമൂഹ്യനീതി വകുപ്പിന്റെയും  ഓർഫനേജ് കൺട്രോൾ ബോർഡിന്റെയും സംയുക്താഭിമുഖ്യത്തിൽ കണ്ണൂർ ജില്ല തലത്തിൽ സംഘടിപ്പിച്ച ചടങ്ങ് പയ്യാവൂർ വെമ്പുവയിലെ അഗതി സംരക്ഷണ കേന്ദ്രമായ തെരേസ ഭവനിൽ നടന്നു. കണ്ണൂർ ജില്ല അസിസ്റ്റൻ്റ് കളക്ടർ ഗ്രന്ഥെ സായികൃഷ്ണ ഉദ്ഘാടനം ചെയ്തു. മറ്റുള്ളവർക്ക് കൂടി വേണ്ടിയല്ലാതെയുളള ജീവിതം ജീവിതമല്ലെന്നും നല്ല പ്രവൃത്തികൾക്കാണ് വാക്കുകളേക്കാൾ പ്രാധാന്യം നൽകേണ്ടതെന്നും അദ്ദേഹം ഓർമപ്പെടുത്തി. ഏരുവേശി ഗ്രാമപഞ്ചായത്ത് പ്രസിഡന്റ്‌ മിനി ഷൈബി അധ്യക്ഷത വഹിച്ചു. ഓർഫനേജ് കൺട്രോൾ ബോർഡ്  മെംബർ സിസ്റ്റർ വിനീത ഡിഎസ്എസ് മുഖ്യാതിഥിയായിരുന്നു. ജില്ല സാമൂഹിക നീതി ഓഫീസർ പി.ബിജു ആമുഖപ്രഭാഷണവും വെമ്പുവ ഇടവക വികാരി ഫാ.ജോർജ് എളൂക്കുന്നേൽ മദർ തെരേസ അനുസ്മരണ പ്രഭാഷണവും നടത്തി. ഏരുവേശി ഗ്രാമപഞ്ചായത്ത് മുൻ പ്രസിഡൻ്റ് ടെസി ഇമ്മാനുവൽ, പി.കെ.നാസർ, എം.ജെ.സ്റ്റീഫൻ, തെരേസ ഭവൻ ഡയറക്ടർ ബ്രദർ ടി.കെ.സജി എന്നിവർ പ്രസംഗിച്ചു. തുടർന്ന് വിവിധ ക്ഷേമ സ്ഥാപനങ്ങളിലെ അന്തേവാസികൾ അവതരിപ്പിച്ച കലാപരിപാടികളും അരങ്ങേറി.   റിപ്പോർട്ടർ: തോമസ് അയ്യങ്കനാൽ