ശ്രീകണ്ഠാപുരം വാർത്തകൾ

ഇപ്പോഴും ഭയം വിട്ടുമാറാതെ, മഴ പെയ്യുമ്പോൾ സമാധാനത്തോടെ ഉറങ്ങാൻ കഴിയാത്ത ധാരാളം ആളുകളെ അവിടെ കണ്ടുമുട്ടി. പുതിയാമറ്റത്തിൽ പാപ്പച്ചൻ ചേട്ടനും അന്നമ്മ ചേടത്തിക്കും കഴുത്തൊപ്പം ചളിയിൽ മുങ്ങി പോയ പശുവിൻ്റെ വെപ്രാളം പങ്കുവച്ചപ്പോൾ ശബ്ദം ഇടറുന്നുണ്ടായിരുന്നു. ദുരന്തത്തിന്റെ പ്രഭവ കേന്ദ്രമായ മഞ്ഞക്കുന്നിൽ നിന്ന് കുതിച്ചെത്തിയ മലവെള്ളപ്പാച്ചിലിൽ തങ്ങൾ നട്ടുനനച്ചു വളർത്തിയ കൃഷിയിടങ്ങൾ ഞൊടിയിടയിൽ അപ്രത്യക്ഷമാവുന്നത് നോക്കി നിൽക്കാനേ അവർക്ക്  കഴിഞ്ഞുള്ളൂ. മികച്ച സാമൂഹിക സേവന പ്രവർത്തനങ്ങൾ നടത്തി മുന്നേറിക്കൊണ്ടിരിക്കുന്ന പൈസക്കരി ദേവമാതാ ഹൈസ്കൂളിലെ സ്കൗട്ട് ആൻഡ്‌ ഗൈഡ്  ടിമംഗങ്ങൾ വിലങ്ങാട് ഉരുൾപൊട്ടലിൽ സർവതും നഷ്ടപെട്ട വിദ്യാർത്ഥികൾക്ക് നൽകാനായി എത്തിച്ച പഠനോപകരണങ്ങൾ വിലങ്ങാട് എസ്ജി ഹൈസ്കൂളിലെ സ്കൗട്ട് മാസ്റ്റർ സിബി ജോസഫും സഹ അധ്യാപകരും ചേർന്ന് ഏറ്റുവാങ്ങി. അധ്യാപകരായ അരുൺ പോൾ, ബിബിൻ ജോസ് , ബെറ്റിമോൾ മാത്യു, ജോമസ് ജോസ് എന്നിവർ നേതൃത്വം നൽകി.   റിപ്പോർട്ടർ: തോമസ് അയ്യങ്കനാൽ