ശ്രീകണ്ഠാപുരം വാർത്തകൾ

കുളത്തൂർ∙ ചുഴലി വില്ലേജിൽ റോഡരികിൽ ദൂരപരിധി ലംഘിച്ചും  ചെങ്കൽ ഖനനം. ചെങ്ങളായി പഞ്ചായത്തിന്റെ കീഴിലുള്ള കുളത്തൂർ- പെരുപറമ്പ്- മാവിലംപാറ റോഡരികിലാണ്  ചെങ്കൽ ഖനനം  തുടങ്ങിയത്.  റോഡിനോടു ചേർന്നാണ് വൻതോതിൽ ഖനനം നടക്കുന്നത്. മാസങ്ങൾക്കുള്ളിൽ  റോഡരികിൽ  വൻകുഴി  രൂപപ്പെടും. വാഹനങ്ങൾക്കും കാൽനടയാത്രക്കാർക്കും ഇത് അപകടഭീഷണിയായി മാറും. ഇതിന് സമീപത്തായി തോടുണ്ട്. താഴ്ഭാഗത്തുള്ള ഒട്ടേറെ കുടുംബങ്ങളുടെ ജലസ്രോതസ്സാണ്  ഈ തോട്. ചെങ്കൽ ഖനനം ഇതിനു  ഭീഷണിയാണ്. ഖനനത്തെ തുടർന്നുണ്ടാകുന്ന  പൊടി മഴയത്ത് ചെളിയായി തോട്ടിൽ ഒഴുകിയെത്തുന്നു. അതേസമയം അനധികൃതമായും അധികൃതമായും  നടത്തുന്ന ചെങ്കൽ ഖനനം മൂലം  പ്രദേശം  വൻകുഴികൾ  കൊണ്ട് നിറഞ്ഞിരിക്കുകയാണ്. ബന്ധപ്പെട്ട അധികൃതർ  ഇതിനെതിരെ നടപടി സ്വീകരിക്കണമെന്ന്  നാട്ടുകാർ ആവശ്യപ്പെട്ടു.